Raport vjetor i KLP për vitin 2023.

Këshilli i Lartë i Prokurorisë gjatë vitit 2023, ka marrë gjithsej 406 vendime, në 32 mbledhje plenare të zhvilluara. Vendimmarrja ka qenë kryesisht e lidhur me akte administrative individuale në funksion të karrierës së prokurorëve. KLP-ja ka pasur gjithashtu në vëmendje dhe ka punuar intensivisht për hartimin dhe miratimin e disa akteve nënligjore, si:
Rregullorja “Për përcaktimin e rregullave dhe arsyeve të lejimit të kandidatit për magjistrat për t’u emëruar në vitin pasardhës”;
Rregullorja “Mbi kriteret dhe procedurën për ngritjen në detyrë të prokurorëve pranë prokurorisë së posaçme kundër korrupsionit dhe krimit të organizuar”; Rregullorja “Për caktimin e rregullave dhe procedurave mbi uljen e ngarkesës së punës për prokurorët”;
Rregullorja “Mbi dhënien e lejes së papaguar”;
Rregullorja “Për vlerësimin etik dhe profesional të drejtuesve të prokurorive të juridiksionit të përgjithshëm”;
Rregullorja “Për caktimin e procedurës dhe masës së trajtimit financiar të prokurorit për shërbimin në skemën e delegimit, për transferimin e përkohshëm, për caktimin e përkohshëm dhe caktimin për një çështje të veçantë”;
Rregullorja “Për organizimin dhe funksionimin e administratës së Këshillit të Lartë të Prokurorisë”

Sipas parashikimeve të Nenit 167 dhe 178 të Ligjit për Qeverisjen, pranë KLP-së funksionon Sektori i Dokumentimit të Seancave, i cili përgatit dosjet me aktet përkatëse për mbledhjet plenare sipas rendit të ditës, zbardh procesverbalet e mbledhjeve, pasqyron mendimet e anëtarëve të Këshillit, propozimet apo vërejtjet që ata kanë lidhur me diskutimet e tyre gjatë mbledhjes, duke i bërë ato pjesë të procesverbalit, redakton materialet e mbledhjeve në respektim të të drejtave të privatësisë, konfidencialitetit, të dhënave personale apo sensitive në raport me palët e treta, etj.
Mbledhjet plenare të KLP-së edhe përgjatë vitit 2023 janë ndjekur nga përfaqësues të institucioneve dhe organizatave të akredituara pranë KLP-së, si dhe nga programet e asistencës ndërkombëtare për zbatimin e Reformës në Drejtësi, EU4JUSTICE dhe OPDAT.
Mbledhjet Plenare të Këshillit kanë qenë të hapura dhe janë ndjekur sipas interesit nga përfaqësues të medias, shoqërisë civile apo çdo entitet tjetër të interesuar për veprimtarinë e KLP-së. Për mbledhje plenare për të cilat ka pasur interes të veçantë, është siguruar transmetimi dhe aksesi online, për të mundësuar përcjelljen e saj në kohë reale.
KLP-ja ka vijuar punën me përgjegjshmëri dhe angazhim maksimal në përmbushjen e detyrimeve të tij kushtetuese dhe ligjore në raport edhe me transparencën ndaj publikut, duke zbatuar të gjitha procedurat e nevojshme për realizimin e mbledhjeve plenare, si njoftimi i rendit të ditës së mbledhjes plenare para zhvillimit të tyre dhe publikimi me transparencë i të gjitha mbledhjeve plenare dhe vendimeve të marra në to, në faqen zyrtare të Këshillit ëëë.klp.al, përfshirë këtu dhe regjistrimin audio të çdo mbledhje.