Inspektorati i Lartë i Drejtësisë

Inspektori i Lartë i Drejtësisë është institucion i krijuar me kushtetutë përgjegjës për verifikimin e ankesave, hetimin me nismë të shkeljeve dhe fillimin e procedimit disiplinor ndaj gjyqtarëve dhe prokurorëve të të gjitha niveleve, anëtarëve të Këshillit të Lartë Gjyqësor, anëtarëve të Këshillit të Lartë të Prokurorisë dhe të Prokurorit të Përgjithshëm. Gjithashtu është përgjegjës edhe për inspektimin institucional të gjykatave dhe të zyrave të Prokurorisë. Inspektori i Lartë i Drejtësisë zgjidhet me tre të pestat e të gjithë anëtarëve të Kuvendit, për një periudhë nëntëvjeçare pa të drejtë rizgjedhje nga radhët e juristëve të spikatur me jo më pak se pesëmbëdhjetë vite punë në profesion dhe integritet të lartë moral dhe profesional. Këshilli i Emërimeve në Drejtësi përzgjedh pesë kandidat për të cilët kuvendi duhet të votojë me shumicë të tre të pestave. Nëse brenda tridhjetë ditëve nga paraqitja e Listës asnjë nga kandidatët nuk ka marrë dot këtë shumicë, kandidati i renditur i pari shpallet i emëruar. Inspektori i Lartë i Drejtësisë gëzon Statusin e Gjyqtarit të Gjykatës së Lartë.